Historia

Igl iniziant Baseli Jacomet, sesents a Mompé Medel e president actual dall’Uniun da scursalar e spassegiar Mompé Medel ha cumprau igl onn 2000 ina maschina da pista. El ha preperau in tschancun dalla via da meglieraziun e dau aschia la pusseivladad a tuts vischins da spassegiar duront igl unviern.

 

Las bunas vias, baghegiadas dalla meglieraziun, ein idealas per scursalar e spassegiar igl unviern. La senda da scursalar e spassegiar da Mompé Medel entochen “sur Fontauna Starnauns” ha ina lunghezia da 4 km. Da leu anora han ils visitaders ina bellezia survesta.

 

Entras las reacziuns positivas dils vischins ha Baseli saviu realisar sia idea d’ina senda da scursalar e spassegiar a Mompé Medel. L’uniun da scusalar e spassegiar Mompé Medel ei vegnida fundada entras grond sustegn finanzial da donaturs ils 7 d’avrel 2001. La digna fiasta d’inauguraziun dalla senda da scursalar ha giu liug ils 30 da december 2001.

 

Per tener aviert la senda da scursalar prestan ils commembers activs mintga unviern ca. 900 uras lavur cumina.

 

Per migliurar nossas finanzas ha l'Uniun da scursalar e spassegiar Mompé Medel menau atras ils 25 da fevrer 2006 ensemen cul Chor Cantalegra Mustér ed ils 2 da fevrer 2008 cun l’Uniun da costums Mustér la sera tradiziunala da tscheiver.

 


Plinavon han ils hosps da lunsch e da maneivel la pusseivladad da scursalar da glina pleina. En l’ustria “Pass Roman vegn silsuenter surviu ina buna tscheina als participonts e stau da buna cumpignia.

 

Sin giavisch d'indigens ed era hosps da vacanzas, ha l'Uniun da scursalar e spassegiar Mompé Medel organisau igl unviern 2006/2007 in bus che menava ils visitaders dalla staziun Mustér a Mompé Medel. Deplorablamein ei buca vegniu fatg grond diever da quella purschida aschia che nus havein strihau quella pusseivladad.

 

Cun nossa senda alternativa da scursalar dein nus caschun als hosps da lunsch e da maneivel d’emprender d’enconuscher nossa grondiusa cuntrada e far enzatgei bien per lur sanadad. Nus purtein aschia veta en nies uclaun.

Contact

Adressa:

Uniun da scursalar e spassegiar

7183 Mumpé Medel

Telefonin: +41 76 451 34 14
Emagl: ussmm@bluewin.ch
Responsabel:

Jacomet Baseli

Via Crestas 28

7183 Mumpé Medel