Mumpé Medel

Mumpé Medel ei ina fracziun da Mustér e schai sin ina collina cun ina grondiusa survesta sur diversas valladas dalla Cadi. Quei uclaun san ins contonscher a pei sur Catins, s.Gions, Gonda, s.Gada a Mumpé Medel en strusch 1 ura. Da present vivan 16 famiglias cun 6 menaschis purils en quei uclaun. A scola van ils affons da Mumpé Medel dapi igl onn 1971 a Mustér. Il mument ha igl uclaun 5 affons, da quels frequentan 2 la scoletta, 3 la scola primara e 3 giuvenils ein egl emprendisadi. Entras la reorganisaziun dalla posta il zercladur 2001 ei il biro da posta a Mumpé Medel vegnius remplazzaus cun in servis da casa. Da Mumpé Medel san ins viagiar viers Sedrun, alp Pazzola sco era en la val Medel. Ei vala la peina da far ina excursiun cun l'entira famiglia sco era cun amitgs e guder la bellezia natira.


La scursalada

La partenza dalla senda da scursalar e spassegiar a Mumpé Medel sesanfla a “Plaun Mumpé” (parcadi, agl ur dil vitg). L’aventura per tuts che vulan far enzatgei per sia sanadad, entscheiva leu. Egl uclaun da Mumpé Medel, da meneivel da Mustér, anfleis vus ruaus e revegnida. La hectica da mintgadi sesanfla lunsch naven. Duront l’ascensiun sur “Clavadials” entochen “Vitgava” gaudan ins la biala survesta. Da leu anora san ins pli u meins contemplar igl entir tschancun dalla descensiun dalla senda da scursalar. Naven dil “mast” fan ils hosps diever dalla via dascensiun sco descensiun e perquei eis ei prudent da far attenziun vicendeivlamein per aschia evitar accidents. Cura ch’ins ha contonschiu la Val da Runs san ins contemplar la “Val Medel” (direcziun Pass dil Lucmagn). Vinavon va l’ascensiun viers “Fontaunas Starnauns”. Il davos tschancun cuntegn pauca pendenza entochen il pli ault punct d’altezia da 1550 m sur mar. Suenter ina biala spassegiada da biebein 45 minutas astga la pausa buc munchentar! Ultra da quei san ins admirar la grondiusa cadeina da cuolms che tonscha naven digl Alpsu viers direcziun Cuera. Silsuenter sa il divertiment dalla scursalada entscheiver. Quella spassegiada san ins far sil di ed era las seras da glina pleina. A tuts che fan diever dalla senda da scursalar e spassegiar e che visetan Mumpé Medel, giavischein nus bia recreaziun!